27-07-2010 Diskurso di diputado Drs. Marugia Janga na alumnonan

PERSBERICHT / KOMUNIKADO PA PRENSA

Voorlichting & Protocol

Remplasando diputado enkargá ku enseñansa

DISKURSO DI DIPUTADO DRS. MARUGIA JANGA NA ALUMNONAN

Kralendijk – Djaluna anochi Fineb a organisá den patio di Bestuurskantoor un resepshon dediká na alumnonan ku pa e aña eskolar benidero ta bai studia den eksterior.

Pa e okashon aki diputado sra. Marugia Janga, remplasando diputado di enseñansa sr. Nolly Oleana a dirigí su mes na esnan presente.

Un pais den desaroyo manera esun di nos mester tin bon base pa un futuro duradero. Hóbennan ku un bon enseñansa ta un nesesidat pa logra e meta aki.

Un bes mas nos a bini huntu manera a bira un kustumber pa nos tuma despedida di nos studiantenan ku ta bandoná nos isla pa sigui ku estudionan mas avansá na Kòrsou, Aruba òf Hulanda. Studiantenan, boso tur tin den boso poder e diploma ku boso a anhelá tantu ku ta e yabi pa boso drenta den un nivel di enseñansa mas avansá. Bonaire a duna boso e oportunidat pa boso por a logra e parti aki. Aki un par di dia, bosonan ta na un di nos hermana islanan òf na Hulanda kaminda boso ta para riba boso nan mes. Boso mayornan no tei mas presente  i ta boso mes tin ku tuma tur desishon.

Mi kier a pidi boso si, di trata pa keda e mes un hóben ku boso ta. Ku e mes karakter humilde. No lubidá te ainda studiante nan di Bonaire tin un bon nòmber den eksterior i ta keda na boso pa mantené esaki. E libertat ku boso ta bai haña awor no mag di bira libertinahe. Ku esei mi ke men bo mester por planeá bo tèmpo den un parti pa studio, kuido na bo mes i tambe pa hòbinan. No por t’asina ku e mundu di goso a yega, pasobra tòg ningun hende no por bisa bo algu. Sea un persona ku ta respetá su mes i no laga bo famia na kaya.

Boneiru ta den desaroyo i nos tin mester di hopi profeshonalnan hóben pa duna realse. Yuda forma e Boneiru ku nos tur ke, esta un Boneiru ku un kalidat di bida hopi haltu.

Bosonan huntu ku tur esnan ku a bai den e añanan anterior pa sigui ku un estudio, tin ku bin karga e Boneiru aki. Nos por haña ayudo di tur parti di mundu, i nos ta agradesido p’esei, pero hecho ta, ku ta nos responsabilidat na promé lugá pa engrandesé nos isla. Basa riba esei gobièrnu di Boneiru ta hasi un súplika na boso pa trata na bini bek ora boso kaba, pa duna un man na e desaroyo di Boneiru.

Na mayornan mi kier a pidi pa duna e yu e sosten nesesario pero laga e siña para riba su mes. Awor ku boso yu  ta bandoná e kas familiar, dun’é tambe e chèns pa e sigui desaroyá su mes. E lo tin ku pasa den tempunan bon i tempunan difísil.

Basá riba e edukashon ku boso a dun’é e tin ku sòru pa e keda semper riba e kaminda korekto. Dun’é boso konfiansa i mi tin sigur ku e lo no laga bosonan na kaya.

Studiantenan, mi ta deseá boso hopi éksito ku boso estudio i ta spera di kurason ku ora boso kaba, boso lo bini bek pa yuda Boneiru den su desaroyo.

Un biaha mas hopi éksito.